唔𪐀經

「唔𪐀經」者，說話文章內容唔切題噉解，即係話同本題冇𪐀冇縺。

「𪐀」者，縺也，粘連也。經者，織成羅網嘅經緯線也，概曰「經 - gaang1」。

1 養蠶人家製作蠶絲扇，先用竹篾或鐵線扎製扇框，然後將綿線繚喺扇框上，織成網格，最後將準備好吐絲嘅蠶蟲放喺網格上，等佢地本能地施展經緯技巧，將剛剛吐出來尚帶粘液嘅絲「𪐀」綿線上。

2 打棉胎師傅將打鬆咗嘅棉花或絲棉厚薄均勻地按照適當長寬平鋪工作台上，再用布線竿(近似漁竿)引紗線縱橫整齊地密布在棉花上，然後用掄盤掄壓，使紗線同棉花緊貼，再用木棍輕輕彈打平行懸掛在棉胎上方嘅一支彈弓絃線，將棉花同紗經彈起，使棉花纖維更實在地「𪐀縺」喺紗經上，以免被心鬆散斷開。